Aktioun „Gielt Band“: Hei dierft Dir plécken!
![](https://www.schengen.lu/wp-content/uploads/2022/06/307853135_7985417268198173_8661559469222334767_n-480x275.jpg)
All Joer gëtt kiloweis zeidegt Uebst, dat an de Bongerten, de Gäert an op ëffentleche Plazen ënnert de Beem fault, verbëtzt. An dobäi wier et esou einfach: Et geet duer, déi Äppel, Bieren, Prommen asw. ze plécken an doraus Kompott oder Gebees ze kachen, de Jus auszepressen oder domat eng Taart ze baken.
D’Saach huet awer een Hoken: Plécken, ouni d’Erlabnes vum Proprietär ze hunn, ass verbueden. D’Léisung? D’Aktioun „Gielt Band“, déi de Ministère fir Landwirtschaft, Wäibau a ländlech Entwécklung zesumme mam Syndikat vun de Lëtzebuerger Stied a Gemengen (Syvicol) an d’Liewe geruff huet. D’Gemengen, Privatleit, Associatiounen an Entreprise kënnen – mat engem giele Band – déi Uebstbeem zeechnen, déi hinne gehéieren an deenen hir Friichte vun der Ëffentlechkeet gepléckt däerfe ginn. De Ministère fir Landwirtschaft, Wäibau a ländlech Entwécklung bedeelegt sech mat deene Beem, déi ënnert senger Opsiicht stinn, och un der Aktioun. (Text: antigaspi.lu)
Markéiert Beem fannt Dir hei an eiser Gemeng:
- Bierenallee zu Elweng (Bieren)
- Bongert zu Elweng (Rue Nicolas Brucher) (Äppel, Kiischten)
- Bongert ënnert der Schoul zu Riemeschen (Bréicherwee) (Äppel, Quetschen, Bieren)
- Bongert beim Buer zu Schwéidsbeng (Äppel)
Wann Dir e Bam oder Strauch op Ärem Terrain stoen hutt, wou Leit vu baussen Zougrëff drop hunn an Dir wëllt Äert Uebst net einfach verfaule loossen, da stréckt einfach e gielt Bändchen ëm de Bam, dat Dir gratis op d’Gemeng ofhuele komme kënnt.
Maacht mat an hëlleft Uebst ze retten!
![](https://www.schengen.lu/wp-content/uploads/2022/06/306722868_7985416911531542_921187342985198802_n.jpg)
![](https://www.schengen.lu/wp-content/uploads/2022/06/306756090_7985417481531485_5892230090764134836_n.jpg)